الرئيسية > انتخابات الرئاسة 2012, انتخابات الرئاسة 2012 - مقالات > إلى المعترضين على قرار ترشيح الشاطر

إلى المعترضين على قرار ترشيح الشاطر

8 أبريل 2012 أضف تعليق Go to comments

إلى المعترضين على قرار ترشيح الشاطر:
إذا كنت تريد الحقيقة فتابع القراءة .. وأسأل الله أن تكون طالبا للحق ..
أما لو كنت هتفضل تهاجم حتى بعد ما تعرف الحقيقة ..
فأنصحك ما تقراش المقال ده عشان هيرفع ضغط دمك ..

= انت معترض ليه (ايه اللى مضايقك) ؟

– هل عشان الإخوان رجعوا فى كلامهم ؟

– ولا عشان الإخوان رشحوا حد منهم ؟

– ولا عشان رشحوا خيرت الشاطر ؟

يمكن التلات أسئلة دول يبانوا انهم حاجة واحدة ..

اسمع يا سيدى ..

وصلى على حبيبى وحبيبك محمد صلى الله عليه وسلم:

الإخوان غيروا قرارهم:
== زى ما عملوا فى نسبة دخولهم مجلس الشعب .. قالوا مش هننزل بأغلبية وبعدين خدوا

حاجة واربعين فى المية من المجلس ..
= طب ما تفتكر معايا :
مش التحالف ده كان بيضم أحزاب كتير ومنهم الوفد والنور ..
الوفد خلع من التحالف لما حس انه ممكن الفلول تسانده .. وعشان يبرر خلعانه .. ادى

للإخوان حوالى خمسميت اسم وشوية عشان يحطوهم على القوائم .. طب ياعم الحاج لما
انت تحط خمسمية .. أمال الغلابة اللى زينا يعملوا ايه .. ماليش دعوة لازم تحطوهم .. طب
شيل منهم الفلول .. لأ هو كده .. مش هينفع .. طب أنا ماشى .. مع السلامة.

حزب النور .. بعد ما عملنا جمعة قندهار سوا .. حس انه ليه يخش مع الإخوان فى تحالف
مع إنه ينفع يبقى لوحده ؟ .. راح قايل انا فى التحالف هابقى مراقب .. يعنى ايه مراقب يا
عم الحاج .. يعنى خلينى اتفرج واشوف الدنيا ماشية ازاى .. وانا لا معاكو ولا عليكو ..
هب وراح منزل حبة فلول صغيرين .. يا جدعان احنا قولنا التحالف خالى من الفلول ..
لاوالله دول ناس كويسين (هما بس كانوا زمان ماشيين مع الحزب الوطنى بس هما
كويسين) .. يا جماعة .. لاوالله مش هينفع .. طيب شكرا

بقى التحالف عامل ازاى يا باشا بعد انسحاب أكبر قوتين منه بعد الإخوان ..

طب يا اخوانا .. نعمل ايه فى النسبة اللى قلنا عليها من 35-40 ..
لازم تتغير .. ازاى نغير كلامنا احنا عاهدنا الناس .. ما اهو احنا عاهدنا الناس اننا مش
هنكون أغلبية فى البرلمان على أساس ان القوى السياسية معانا (زى ما كنا فى التحرير
وقت العهد بتاعنا) .. فلما القوى السياسية دى تبقى نازلة قصادنا – ضدنا يعنى فى
الانتخابات – فكرك مش هياخدوا أى أصوات خالص .. طب فكرك ان كل اللى احنا هنزلهم
هيكسبوا .. يعنى لما ننزل 100 واحد كلهم هيكسبوا؟ .. ليه .. بنلاعب نفسنا؟

المهم عشان طولنا فى الحتة دى:
الإخوان زودوا نسبة المرشحين عشان الظروف اللى خدنا فيها قرارنا أو عهدنا اختلفت.

نفس الكلام عن تغيير القرار بالنسبة للرئاسة

وتعال معايا نفكر بوجهة نظر واحد مابيحبش الإخوان (مش انت لا سمح الله):

هو فيه حد بيلعب سياسة بالنعومة والملائكية دى؟
حد يبقى عارف انه يقدر يضحك على الناس البسيطة فى الشعب المصرى ويكسب
أصواتهم بإسم الدين .. ويفوت الفرصة دى؟

حد يبقى عارف انه يقدر يضحك على الناس اللى مشششش بسيطة فى الشعب المصرى
ويكتسح كل النقابات تقريبا .. ويفوت الفرصة دى؟

حد يبقى عارف انه أكتر القوى السياسية تنظيما .. وأقرب واحد للناس ويفوت الفرصة دى؟

حد يبقى عنده الكوادر السياسية دى كلها .. والرموز المجتمعية .. والأفراد .. والأموال ..
والانتشار ..

حد يبقى عنده خبرة السنين دى كلها .. وصلابة وتماسك صفه .. ورصيد محن وابتلاءات
تكسر ظهر أشد تنظيمات الدنيا .. ومع ذلك لسة شغالين .. وبيزيدوا ..

حد نعمل فيه البدع كلها فى الإعلام .. ونصرف ملايين الدولارات على قنواتنا وبرامجنا
وضيوفنا وتوك شوزنا .. ومع ذلك الناس تبعد عننا و تقرب لهم وتزيد شعبيتهم

يا أخى .. دا لما مبارك نزل آخر ورقة عنده للغرب .. خوفهم بالإخوان (مش بالقاعدة) ..
:
:
(بالله عليك مش مكسوف انك بتتهمهم بالتهم دى .. وهى شرف لأى حد .. لكن خلينى مكمل

معاك)
:
يا أخى دول طلعوا زى الجراد فى كل ثورات الربيع العربى .. انت شفت عملوا ايه فى
تونس .. دا حتى أردوجان شكلوا باين عليه انه من الإخوان .. حاجة غريبة جدا

= هو ايه اللى غريب يا عم الحاج؟
== الموضوع فيه إنة

= الله ينور عليك .. الموضوع فيه إنة

== حاجة من اتنين:
ياإما الإخوان كدابين ..
يا إما منافقين.

== ما هو مش ممكن حد يلعب سياسة إلا بنجاسة.

= طب ممكن أقولك معلومة هتخضك ..
بس بالله عليك .. بالله عليك ..
فكر فيها بعقلك المجرد .. لا واحد بيحب الإخوان ولا بيكرههم ..
معلش استحمل دقيقة واحدة بس وجرب تكون محايد ..

انت عارف إن الإخوان عرضوا على ناس مش منهم انهم ينزلوا انتخابات الرئاسة

والإخوان هتدعمهم؟
انت عارف ان الناس دول رفضوا؟
عارف مين الناس دول؟
أنا أعرف اسم اتنين منهم:
د/ طارق البشرى
المستشار/ حسام الغريانى

== معناه ايه الكلام ده؟
= استنى بس قبل ما تتحول .. (لسة الدقيقة الحيادية ماخلصتش 🙂 أوعدك انها دقيقة واحدة
بس)

= معناه ان الإخوان راحوا لناس مش منهم .. قالوا لهم انزلوا انتخابات الرئاسة .. مالهاش
معنى تانى أو تالت ..
== مش من الإخوان ..
= آه والله العظيم مش من الإخوان ..
== انا مش مصدق ..
= عندك حق ماتصدقش ..
بس فيه حاجة جميلة .. الناس دى لسة عايشة وتقدر تروح تسألهم ..
== طب ازاى يعملوا كدا؟

= عشان يحافظوا على العهد اللى عاهدوا بيه الناس

(يالا .. اتحول دلوقتى)
== آآآآه .. هما عايزين رئيس طرطور ..
= أنا معاك .. بس ايه اللى يضمن انه هيبقى طرطور للإخوان؟
== …
= مش سامعك ، قول ماتخافش .. أمريكا اللى بتموت فى دباديب الإخوان .. إسرائيل اللى
مستضيفة حماس (اللى هى إخوان) عندها عشان أوليمبياد غزة .. السعودية والخليج اللى
عمالين يضغطوا على المجلس العسكرى ترغيبا وترهيبا عشان المخلوع وعشان عدوى
الثورة ماتعديش البحر الأحمر ..
== المجلس العسكرى !
= برافووو .. جبت من الآخر .. هنتكلم عن المجلس العسكرى كمان شوية .. بس انت

هربت منى ليه؟

= إيه رأيك فى ان الإخوان يروحوا للناس دى ويعرضوا عليهم دعمهم للرئاسة؟
== عشان مايدعموش ابو الفتوح اللى علم على قفاهم لما قرروا يرشحوا الشاطر ، وظهر

ان تفكيره سابق تفكيرهم بسنة
= 🙂 بالراحة شوية دول كذا حاجة:
أبو الفتوح:
== أيوة الإخوان اتلككوا لابو الفتوح ، مع انه شخصية ماحدش يختلف عليها وعنده

الكاريزما والخبرة والاحتكاك ولما …
= استنى بس .. انت بتحب ابو الفتوح من زمان ولا من ساعة ماساب الإخوان؟
== لأ ، انا ماعرفتوش كويس إلا لما ساب الإخوان وجه على الفضائيات واتكلم وعرض
أفكاره لقيته شخص متزن وعنده إمكانيات هائلـ …
= زى الفل ، مين قالك ان الإخوان ماعندهمش اللى أحسن من ابو الفتوح (طبعا بنتكلم على
الظاهر أما عند ربنا فهو أعلم بمن اتقى)
وده بالظبط هو مربط الفرس:
= انت عارف الإخوان عملوا ايه عشان يقرروا هيدعموا مين للرئاسة ؟
== وهاعرف منين ؟
= اسمع دى (لو عرفت تبقى حيادى كويس .. ماعرفتش .. ماتتعبش نفسك :))
الإخوان مش ناس هبلة .. ممكن يكونوا مكارين .. ممكن يكونوا خبثاء .. ممكن متآمرين ..
ممكن انتهازيين .. ممكن اى حاجة من هنا للصبح .. بس : احترم عقلك وماتقولش ناس
هبلة ..
= ماشى ؟
== ماشى.
= ده قرار مصيرى .. علشان يدعموا رئيس .. لازم الموضوع يتفرم دراسة .. صح؟
== صح.
= هما كانوا بيضحكوا على الناس لما قالوا مش هنرشح رئيس مننا ..
== تمام ؛)
= لو انت مكانهم هتعمل ايه؟
== أدور على تلكيكة .. وانزل المرشح بتاعى.
= بس ده هيأثر بشدة على شعبيتك ، وخصوصا فى ظل تفتيت الأصوات ووجود اتنين
أصلا من الإخوان واحد منهم بيدعمه السلفيين والتانى باقى الإسلاميين؟

== أدعم واحد منهم .. ويبقى ضربت عصفورين بحجر

= الله ينورعليييييك .. ما بدل البهدلة دى وصورتكوا اللى اتشلفطت عند الناس .. كدا
هيبقى أسهل بكتييير جدا انكم تقولوا:

آآآآآآسفين يا ابو الفتوح .. احنا كنا غلطانين

آآآآآسفين يا شيخ حازم .. تعالوا معانا يا سلفيين ندعم ابو اسماعيل ..

هييييه ..
الإخوان التزموا بقرارهم ..
شكلهم جينتل جدا لما اعتذروا .. وده زود شعبيتهم ..
وضمنوا ان الرئيس اللى جاى بتاعهم ..

== ما هو ده اللى مجننى !!! ايه الغباء ده ؟؟
= هاه .. احنا اتفقنا .. اتهمهم بأى حاجة .. إلا الهبل 🙂

== أمال تسمى ده ايه ؟؟ ازاى ينسفوا شعبيتهم بالسهولة دى ؟
= أنا أقولك ..
هما كذا خطوة:

الخطوة الأولى:
عملوا معايير للشخص اللى هيدعموه للرئاسة.
معايير كتير .. أنا شخصيا ماعرفهاش كلها ..
بس دى حاجة تخصهم (بما انهم انتهازيين) ..

وبعدين الخطوة التانية:
شافوا مين اللى تنطبق عليه المعايير دى (من وجهة نظرهم).
وحطوا شرط مهم جدا: انهم مش هيتقيدوا بالمرشحين الحاليين (ساعتها) للرئاسة.
== يعنى ايه؟
= يعنى اللى هتنطبق عليه المعايير دى هندعمه لو كان مرشح بالفعل ، أو هنقول له يترشح
ونسانده لو ماكنش مرشح حاليا..

الخطوة التالتة:
رتبوا الناس اللى انطبقت عليهم المعايير دى.

الخطوة الرابعة:
بدأوا يتصلوا بيهم ويحاوروهم ويقنعوهم ويطمنوهم و ..و ..
(وده أكبر سبب خلاهم يتأخروا فى الإعلان عن مرشحهم.)
وكل مايروحوا لواحد وياخدوا معاه بتاع اسبوع محاولات .. والراجل مش عايز

== ليه؟ ايه الأسباب ؟ واحد جاية له الرئاسة على طبق من ذهب ويرفضها؟ هو فيه ناس
كدة؟

= شفت بأة انهم مش مختارين أى حد .. وآدى الناس دى عندك وروح اسألهم.

المهم:
تزامن رفض الناس دى للترشح مع كذا حاجة :
– رفض المجلس العسكرى إقالة حكومة الجنزورى

– التهديد الصريح من المجلس العسكرى بتكرار سيناريو 54

– الناس اللى الإخوان انتخبوهم عشان تأسيسية الدستور .. انسحبوا !! مع ان ناس كتير منهم
لما اسمهم اترشح .. اتصلوا بالإخوان وشكروهم جدا .. فلما غيروا موقفهم وانسحبوا ..
اعتذروا للإخوان وقالولهم كلمة السر (ضغوط شديدة جدا علينا)

– رفض المجلس العسكرى القاطع لتولى الإخوان للسلطة التنفيذية وان هناك وزارات مالكمش دعوة بيها خالص وما تحلموش بيها .. وانت مالك يا مجلس .. هو كدا
أمال احنا داخلين انتخابات وأغلب الشعب فوضنا عشان نعمل ايه .. امسكوا كام وزراة كدا
قلبوا فيها رزقكم .. طب والتنمية ومحاربة الفساد والثورة .. إيـــــه ! (ايموشن شفيق)

– التسبيح والتمجيد والتهليل للمجلس العسكرى وكل رايات الولاء والوطنية اللى رفعها
العلمانيين والليبراليين والإعلاميين والمثقفين وكل حد غير التيار الإسلامى
لدرجة انها وصلت انهم يقدموا وثيقة للمجلس بعنوان:

“اقلبنى شكر”
مش مصدق ..

اسكوووت .. مش طلع ان الإخوان صفقة مع المجلس العسكرى .. فاكر:
بيع بيع بيع .. الثورة يا بديع.

اسكوووت .. مش طلع انهم بيطالبوا المجلس العسكرى يشكل لجنة الدستور .. فاكر:
لا دستور تحت حكم العسكر.

اسكوووت .. مش طلع ان الديمقراطية مش معناها الأغلبية .. فاكر:
الديمقراطية يا منى .. الديمقراطية يا عمرو .. الديمقراطية يالميس.

المهم عشان ماتتعبش نفسيا زييى 🙂

دى كانت الأحداث اللى تزامنت مع رفض الناس اللى الإخوان راحو لهم انهم يترشحوا.
بقى قاضل حاجتين:

يا إما ندعم واحد من الإخوان المرشحين بالفعل
أو
بما اننا كدا كدا هنكسر كلمتنا اللى قلناها قبل كدا .. وهنتحمل التكاليف الرهيبة (ماديا
ومعنويا) لنتائج هذا القرار يبقى نعمله صح:
لو رشحنا حد من الإخوان .. نرشح مين؟

ونفس الكلام عن الأولويات والمناسب و.. و..
وفى الآخر طلع القرار:

هنغير قرار الشورى لتغير الظروف

بما اننا هنغير قرارنا يبقى هنرشح من الإخوان اللى شايفينه من وجهة نظرنا أقدر على
المهمة

وبناء على ذلك هنرشح خيرت الشاطر

===============

أنا مش باقول لك كل ده عشان تقتنع .. انا عارف انه صعب
صعب تصدق ان الإخوان مخلصين لبلدهم ..
صعب تصدق ان الناس اللى اتعرض عليهم كل حاجة عشان يفوتوا للمجلس اى حاجة فى
مصر الثورة .. ورفضوا

احنا شعب طيب وبننسى..
فاكر وثيقة السلمى .. (الوضع الإلهى للجيش فى الدستور .. لا يسأل عما يفعل)
فاكر مين اللى كان معترض عليها .. آه والله .. التيار الإسلامى
أمال فين الصفقة .. (فى الإعلام)

فاكر .. يسقط يسقط حكم العسكر
فاكر .. لما اتقال ان المجلس العسكرى ضغط علينا عشان مانحطش ناس معينة فى لجنة
الدستور .. عارف مين الناس المعينة دول .. دول قاعدين دلوقتى مع المجلس.
فاكر .. حق الشهيد اللى الإخوان باعوا دمه
فاكر .. سنقبل بالديمقراطية مهما كانت النتائج ..
فاكر .. الإخوان مش عايزين الحكومة عشان بيتهربوا من المسئولية وهما مش نافعين إلا
فى المعارضة وبس.

انت عارف انت معترض على إيه ؟
انت معترض على ان واحد رشح نفسه ..
آه والله .. انت مش معترض على انه بقى رئيس جمهورية .. انت معترض على انه رشح
نفسه ..
افتكر كدا معايا:

البرادعى: لن أرشح نفسى فى انتخابات الرئاسة القادمة

ابو الفتوح: إذا ترشح العوا سأتنازل

العوا: انا ماعرفش أدير مكتبى .. عايزانى اترشح للرئاسة؟ لالالالالا.

انا مش باقول الكلام ده عشان اقول الناس اتلونوا ..
انما عشان ماشوفتكش معترض أوى على مواقفهم دى زى ماانت معترض على الإخوان..

انت ليه مااتضايقتش من الناس دى واتضايقت من الإخوان؟
هل عشان بتحب الإخوان؟
(إدعيلهم لإن الموضوع أكبر مما تتوقع .. احنا قلبنا الطرابيزة على المجلس العسكرى)
هل عشان بتكره الإخوان؟
(حتى بعد ما عرفت الحقايق دى؟)
طيب ممكن تكلف خاطرك وتقرا بيان الإخوان اللى طلعوه امبارح بمناسبة ترشيح خيرت الشاطر .. والله مهم جدا

===================
وأخيرا :
إدعى معايا الدعاء ده:
اللهم ان كنت تعلم ان الإخوان أخذوا ذلك القرار رياءًا وبطرا وتفضيلا لدنيا ..
فاللهم ردهم إلى رشدهم
أو انتقم منهم شر انتقام

اللهم ان كنت تعلم ان الإخوان أخذوا ذلك القرار ..
إعلاءً للحق ..
وأخذاً بالأسباب ..
وابتغاء مرضاتك ..
فوفقهم لكل خير ..
ورد عنهم كيد عدوهم ..

وبارك لهم كما وعدت من اتبع هداك ألا يضل
ولا يشقى

اللهم أرنا الحق حقا وارزقنا اتباعه
وأرنا الباطل باطلا وارزقنا اجتنابه

وصلى اللهم على خير خلقك ومعلمنا سيدنا محمد وعلى آله وصحبه ومن سار على هديه

واتبع هداه إلى يوم الدين وسلم تسليما كثيرا

سبحان ربك رب العزة عما يصفون
وسلام على المرسلين
والحمد لله رب العالمين

Advertisements
  1. لا توجد تعليقات حتى الأن.
  1. No trackbacks yet.

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s