الرئيسية > انتخابات الرئاسة 2012, انتخابات الرئاسة 2012 - مقالات > ليه الإخوان رشحوا خيرت؟؟؟ واشمعنى دلوقتي؟

ليه الإخوان رشحوا خيرت؟؟؟ واشمعنى دلوقتي؟

8 أبريل 2012 أضف تعليق Go to comments

بسم الله الفتاح

ليه الإخوان رشحوا خيرت؟؟؟

وليه لأ أصلا؟

عشان قالوا قبل كده مش هنرشح

فيصبح السؤال:

ليه الإخوان قالوا قبل كده مش هنرشح؟

لتلت أسباب

– مبارك كان بيتحجج بالإخوان ومش راضي يمشي

– لوحدة ما يسمى بالقوى الوطنية

– صعود أحد الأسلاميين للحكم في هذا الوقت ربما يدخل البلاد فيما لا تحمد عقباه من تصادمات وهي في حاجة لكثير من البناء اولا

………………………………………………..

وإيه بقى اللي غير ده ان شاء الله؟

– بالنسبة لرحيل لمبارك

مبارك بالفعل مشي من أكتر من سنة والإخوان برضة ما غيروش رأيهم لأن السببين التانيين كانوا ما زالوا موجودين

– بالنسبة لوحدة القوى الوطنية

ده ما حصلش أصلا ولم يتم الاتفاق على أي شيء بين أي حد

وبمجرد طرح فكرة رئيس توافقي من قبل جماعة الإخوان اعترضت كثير من الجهات واعتبرت أن في ذلك حجرا على إرادة الشعب .. والرئيس التوافقي لم يكن ليفرض على الشعب ولكن تتفق عليه القوى الوطنية …. ولم تتفق القوى الوطنية على أي شخص بعينه … ورفضوا الاتفاق من الأساس

تم بالفعل الاتصال بكثير من الرموز الوطنية المصرية المعروفة بتاريخها المشرف لتحمل المسئولية .. ولم يوافق أحد على الإطلاق على ذلك

-بالنسبة لصعود أحد الإسلاميين ؟

ما هو أصلا لم يعد على الساحة غير الاسلاميين والفلول من أصحاب احتمالية الفوز

فلم يتبقى للجماعة إلا أحد الاحتمالات الأربعة:

= يدعموا أحد الاسلاميين

= يدعموا احد الفلول

= يرشحوا واحد من عندهم

=لا يدعموا أحد أصلا وعندهم البرلمان ينفذوا من خلاله مشروعهم اللي بيقولوا عليه ويشكلوا الحكومة اللي هم عاوزينها

………………………………………………………..

بالنسبة لترشيح أحد الإسلاميين

مع خالص الاحترام لجميع المرشحين:

الشيخ حازم …

يتصور الإخوان انه ليس الرئيس المناسب للفترة الراهنة .. ربما يكون مناسب في وقت آخر الله اعلم

لكن ووفق بعض ما صرح به يفتقد لكثير مما يجعلنا نظن أنه المرشح المناسب

الدكتور أبو الفتوح ….

لو تم دعمه لقيل أسوأ مما قيل في الخمر بل أسوأ ما قيل عن اختيار الشاطر من أشد كارهي جماعة الإخوان

دي كانت لعبة من الاول وحركة وخيانة وصفقة ومسرحية وكيت وكيت

ترشيح الشاطر أفضل لأنه من يعترض سيعترض على القرار .. أما الشاطر فهو رجل نزيه و إداري من الطراز الأول _ من وجهة نظرنا على الأقل_ وهو أصلا المسئول عن ملف نهضة مصر داخل الجماعة

أما أبو الفتوح فكان نجمه سيأفل متهما بالكذب وعقد صفقة مع الاخوان من البداية

الدكتور سليم العوا…

أحد المرشحين المحترمين

ولكن له بعض التصريحات أخيرا التى ربما تبعث برسالة أنه سيظل قامة كبيرة في مجاله كمفكر كبير ولكن ليس كسياسي _ و أنا شخصيا كنت أميل لترشيح العوا في البداية_ بالإضافة لأنه يلقى رفضا من قطاعات كبيرة من السلفيين و الأقباط

…………………………………………………

مين قال أصلا إن الإخوان مفيش قدامهم غير الاحتمالات دي

لسه احتمال…. ما يعطوش أي حد واللي ينجح ينجح

ويشتغلوا هم من خلال مجلس الشعب ماهم مكوشين عليه وبكرة يشكلوا الحكومة كمان

طب ما أنا ذكرت الاحتمال ده .. وكان مطروح في اجتماع مجلس شورى الجماعة لكن

بالنسبة للحكومة … ما احنا شفنا اللي حصل الفترة اللي فاتت والمجلس العسكري قافش على الحكومة ومتبت والحكومة بتقول مش ماشين الا بأمر المشير

وده كان بيان الاخوان

مش بس كده … المجلس العسكري بيقول للإخوان في بيان نازل لهم مخصوص ولتذكروا التاريخ

يعني عبد الناصر مش بعيد قوي يعني

طيب ما الرئيس هيتغير بعد شهرين وساعتها ممكن يشكلوا الحكومة .. ما هم معاهم مجلس الشعب

ما هو كمان المجلس العسكري يلوح أيضا بحل مجلس الشعب وما زالت القضية منظورة امام المحكمة الدستورية

و للاسف حتى بعض القوى التي شاركت في الانتخابات تصرح الآن بان الانتخابات غير دستورية وقصة الفردي والقائمة اللي احنا عارفينها دي

وبالمناسبة الإخوان كانوا مرشحين خيرت الشاطر لرئاسة الوزارة .. يعنى موضوع الرئاسة لم يكن في الحسبان أصلا

الخبر الجامد جدي كمان هو ما يبدو من احتمال ترشيح عمر سليمان

يعني فيه احتمالية:

– ترشيح عمر سليمان

-بقاء الحكومة

– حل البرلمان

يعني المربع صفر

في النهاية لازم يكون فيه قرار

والقرار لازم يكون دلوقتي عشان باب الترشح هيقفل

ايه القرار بقى؟؟؟؟؟؟؟؟؟؟؟؟؟؟

مجلس شورى الجماعة ومكتب الارشاد …. اجتماع…..طرح كل الآراء…. تصويت

والنتيجة: 56 يؤيدون الدفع بمرشح في مقابل 52 يرفضون

بس لأن ده عمل جماعي

ولأن في الآخر لازم يكون فيه قرار

ولأن دي جماعة وقرارها مش فردي

فلازم نتيجة الشورى تحترم

_______________________________

في النهاية .. ممكن يكون مش ده القرار الصحيح

لكن ده القرار اللي نعتقد إنه صحيح

في النهاية – نهاية تانية – لك أن تصدق ..تقتنع .. تؤيد … أو تعمل حاجة أو اتنين من التلاتة … أو ماتعملش حاجة من التلاتة خااااالص

Advertisements
  1. لا توجد تعليقات حتى الأن.
  1. No trackbacks yet.

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s