أبو الفتوح .. المغرد خارج السرب

11 أبريل 2012 أضف تعليق Go to comments

أبو الفتوح ” المغرد خارج السرب ” كما كانوا يقولون ،تثبت الأيام مرة تلو الأخرى كم كانت تغريداته هي الأبعد نظرا والأصدق حدسا.إلى كل مغرد خارج السرب : كن فارسا نبيلا وإن كثرت الخراف.”

فالصراحة أنا تأثرت جدا و حسيت أد إيه كنت ظالم نفسى بالقعدة وسط خراف ريحتها وحشة و أنا ممكن أبقى فارس نبيل مغرد .. فقررت أنضم لحملة الفرسان المغردين – حملة دكتور أبوالفتوح

بس أنا مش حغلط الغلطة مرتين .. المرة ديه لازم أتأكد فعلا إن الوضع مش حيتكرر .. لازم أخد بالى إنى مظلمش نفسى تانى فى موضوع الخرفان ده

فرحت أسأل واحد فارس مغرد من حملة أبو الفتوح شوية أسئلة 🙂

■ هو دكتور أبوالفتوح معاه المكتب التنفيذى بتاع الحملة بتاعته .. بيقولهم يعملوا إيه و هما يمشوا وراه زى الخرفان ولا بياخد رأيهم ؟؟
■ طيب لما بيأخذ رأيهم أكيد بيعترضوا على بعض القرارت؟ مش ممكن يكونوا خرفان معندهمش شخصية و كلهم رأيهم من رأى الدكتور 🙂 هل إعتراضهم بيبقى إستشارى و بعدين الدكتور بيعمل اللى هو عايزه فى الآخر و لا رأيهم بيمشى ؟
■ و لو رأيهم بيمشى .. القرارت بتاعتهم بيأخذوها إزاى 🙂 ؟ هل مثلا كل القرارت لازم يبقى عليها إجماع؟ بس كده مش حيعملوا حاجة أبدا إلا إذا كانوا خرفان كلهم رأيهم واحد 🙂 أكيد بيمشوا بالأغلبية مش كده؟ بس إستنى ده معناه فى ناس حتعمل إلى هيا عايزاه و الباقى حيبقوا زى الخرفان 🙂 ينفع كده
■ أه صحيح؟ وبالنسبة لحفلة الأزهر كان فيها بتاع 1000 متطوع أكيد مش كلهم أعدوا خططوا لليوم مع بعض أكيد فى مجموعة خططت و مجموعة جت تنفذ .. زى الخرفان يعنى 🙂
■ على فكرة أكيد أنا متحامل و بتكلم فى حاجات جانبية 🙂 تعالى نسأل على حاجات مهمة أكتر.. إختيار الفريق الرئاسى. هو د أبوالفتوح إختاره لوحده و الباقى سمع الخبر زى الخرفان 🙂 ؟ و لا المكتب التنفيذى صوت لكل إسم بالأغلبية؟ و الباقى اللى مش موافق سمع الكلام زى الخرفان؟ طيب و الناس اللى مش فى المكتب التنفيذى .. الألاف اللى فى حملة أبوالفتوح. حد خد رأيهم و لا سمعوا الكلام زى الخرفان 🙂 ؟

الصراحة الحقيقة مكنتش اللى أنا متوقعها 😦 د أبوالفتوح طلع بيأخذ قرارات كتير لوحده و حتى القرارت اللى بيأخذها المكتب التنفيذى مش بتكون دايما بالإجماع .. غير إن د أبوالفتوح و المكتب التنفيذى مش بيقعدوا مع كل الحملة قبل ما يأخذوا أى قرار .. من الواضح إنهم لا طلعوا فرسان و لا طلعوا مغردين بره السرب .. كل اللى عملوه إنهم سابوا سرب و راحوا يغردوا فى سرب تانى 🙂

بس أنا مش حسكت .. أنا مصر على ترك قطيع الخرفان لأن الريحة بقت لا تحتمل الصراحة .. لازم أحقق حلم الفارس المغرد خارج السرب لازم أشوف حل تانى

لقيتها .. سنحيا كراما 🙂

بس المرة دى حبقى حريص أكتر علشان متخدعش زى ماتخدعت فى حملة أبوالفتوح لازم أسأل شوية أسئلة

■ هو الشيخ حازم معاه المكتب التنفيذى بتاع الحملة بتاعته .. بيقولهم يعملوا إيه و هما يمشوا وراه زى الخرفان ولا بياخد رأيهم ؟؟
■ و كملوا أنتوا بقه علشان أنا زهقت 🙂

طبعا الإجابة واحدة 🙂

طيب إيه الخلاصة ..

الخلاصة إن لو حضرتك فهمت من المقال إنى بهاجم حملة أبوالفتوح أو حملة أبوإسماعيل تبقى حضرتك مفهمتنيش .. دول فى الغالب ناس أفاضل .. النقطة إن اللى بيحصل فى الإخوان هو اللى بيحصل فى أى تجمع بشرى تانى عايز ينجز أى حاجة و اللى بيحاول يفهمك عكس كده ببساطة بيشتغلك 🙂

و أمرهم شورى بينهم .. و لما العدد يعدى الحدود المنطقية للشورى .. القاعدة بتنتخب من بينها ممثلين لمجلس الشورى .. مجلس الشورى بيأخذ القرارت بناء على توجه القواعد و القواعد بتثق فى القيادة و بتحاسبها عند الخطأ و بتلتزم بالطاعة الراشدة عند إتخاذ قرار من المجلس المنتخب

إه ده .. إيه كل الكلام البيئة ده؟ ثقة و طاعة و كلام مش شيك خالص الصراحة !!

تعالى نقوله بطريقة أشيك

Ikhwan deploys a hyprid democracy system, where the members of the organization elect representatives. The representatives, gaining trust by the election process, would be entitled to take decisions according to the organization direction. Yet, any member can make suggestions or drive initiatives, which can be adopted later by the organization. In all cases, members are expected to show organizational commitment by adhering to the final decisions made.

كده أشيك شوية مش كده 🙂

بس للأمانة الفارق بسيط جدا – حضرتك إخترت تثق فى شخص واحد فقط معاه مجلس إستشارى هو معينه و من قبل حتى ما يعلن برنامجه الإنتخابى أو مين فى المجلس الإستشارى بتاعه و أنا إخترت إنى أثق فى 120 واحد إحنا مختارهم و منهجهم مكتوب و رسالتهم واضحة ..

بيغلطوا و يصيبوا و ساعات القرار بيعجبنى و ساعات لأ .. لكن معاهم مشروعى أقرب للتحقق .. أيوة مشروعى أنا 🙂 مشروعى الشخصى و أنا المسئول الأوحد عنه .. سواء كنت فى المقدمة أو فى المؤخرة مش مهم .. طالما ماشي فى طريق دعوتى مش مهم الناس تشاور عليا بإعجاب أو بنقض أو ما تشاورش عليا أصلا .. مش فارقة معايا مدام ماشى صح .. و ممكن أقابل فى طريق الدعوة الظريف و الرخم و المستغل و المضحى و الملتزم و قليل الذوق و المنافق و المؤدب ولا بتفرق معايا 🙂 أنا داخل لهدف أكبر من إنى أقضى وقت لطيف مع الإخوة 🙂 أنا داخل علشان الناس يوصلها الخير و تفهم و تطبق الرسالة: كل الناس على فكرة اللى بيحبنا و اللى بيشتمنا و اللى بينافقنا .. كل الناس بلا إستثناء

و علشان كده عمرى ما حبقى فاتحون ولا حازمون ولا حتى شاطرون 🙂 أيوة ولا حتى شاطرون لأن رغم تميز خيرت الشاطر عن باقى المرشحين فهو بالنسبة لى أخ مميز كلفناه بمهمة ثقيلة .. ليس هو أفضل الإخوان و ليس الوحيد القادر على حمل المهمة و ممكن يبقى فى جوة الصف 100 واحد تانيين على نفس المستوى أو أحسن و لا أظن هو شخصيا يرى نفسه أفضل من فى الصف و لا أظن أى عاقل حيحب يبقى فى موقفه ..

و لو أخطأ الشاطر و قرر يبقى من المغردين خارج السرب فجزاه الله خيرا و ليذهب معه الشاطرون و ليبقى فى الصف فقط من يؤمن بالرسالة و ليس بالأشخاص .. الكل يخدم دعوة الإسلام بطريقته و إستبقوا الخيرات

و بالنسبة لموضوع الفروسية فالفروسية إلتزام حتى و إن لم يدرى بك أحد و ممكن تلاقيها فى قصة سيدنا عمر لما جالوا خبر فتح نهاوند

حدثنا أبو عثمان قال : ذهبت بالبشارة إلى عمر فقال : ما فعل النعمان ؟ قلت : قتل ، قال : ما فعل فلان ؟ قلت : قتل ، قال : ما فعل فلان ؟ قلت : قتل ، فاسترجع ، قلت : وآخرون لا نعلمهم ،قال : لا نعلمهم لكن الله يعلمهم .

فعلا ما ضرهم ألا يعلم عمر أسمائهم

و فى الختام أخى الحبيب .. أبوالفتوح والشخ حازم وخيرت الشاطر كانوا من أسباب إلتحاق الكثير بالدعوة .. جزاهم الله عنا خيرا و إستعملهم و نفع بهم و سأظل أحبهم فى الله إن شاء الله ما حييت

Advertisements
  1. لا توجد تعليقات حتى الأن.
  1. No trackbacks yet.

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s